KUYA

Sana nakita kita kahit sandali

Nakagawa sana tayo ng alaala

Ang buhay na wala ka ay di madali

Lagi ko tinatanong kung paano kaya

Paano kaya kung umiiyak ako

Magbibigay ka ba ng payo o panyo

Masarap ka din kayang kasama

Katulad ko mapangasar din ba sa iba

Ikaw ba yung tipong pala aral sa gabi

O baka naman habulin ng babae

Paano ka kaya mag alaga sa amin

Showy ka ba o tipong mahiyain

Pagpikit ko iniisip ko ang itsura mo

Sabi nila sobra mo daw gwapo

Mala Enchong, Daniel o Coco?

Hindi ko alamkung sino sa tatlo

Pero isa lang ang sure akong totoo

Magandang lahi ang mabibigay mo

Sana andito ka para protektahan kami

Sa lahat ng taong gusto sa’ming umapi

Sana kasama ka sa lahat ng lakad namin

Sigurado akong sobra ang tawanan natin

Sana may litrato kang pwede kong tignan

Na magpapa-alala sa masayang nakaraaan

Sa tuwing kaarawan mo sana andito ka

Kasabay naming kumakain ng simpleng handa

Sana nakita mo ang pagbabago ng bawat isa

Kasi ngayon meron na silang buhay na iba

Kung andito ka may diploma ka na ngayon

At nagtatrabaho na sana ng tatlong taon

Sana naranasan mo ang saya ng bawat pasko

Lalo na ang pagtanggap ng simpleng regalo

Sana andito ka tuwing dadating ang bagong taon

Nagpapaputok at kasabay naming tumatalon

Sana may picture tayong pamilya all together

Na pwedeng ipost sa facebook, instagram at twitter

Sana andito ka na pwede kong sandalan

Tuwing may problema pwede kong matakbuhan

Sana andito ka na pwedeng tumapik sa balikat ko

Kapag nahihirapan ako at gusto ng sumuko

Sana joker ka na magaling magpatawa

Kasi sa buhay na ito maraming problema

Hindi mo nalaro ang lahat ng may ball

Sayang di mo naenjoy ang laro sa bawat console

Pero baka ikaw yung tipong pang career lang

At wala ng panahon pang maglibang

Sayang di ka kumapit ng maigi

Kaya sandali ka lang dito namalagi

Sabi nila wala daw kami kung nandito ka

Magpapasalamat ba ako na ikaw ang kinuha

Magsasaya sa buhay na dapat sa iyo sana

Pero baka kasi ito talaga ang nakatadhana

Ang mabuhay na masaya at nangungulila

Dahil kahit kelan wala akong matatawag na KUYA